Gin-report sang Vatican nga may gamay nga improvement sa kondisyon ni Pope Francis sa ikapito sini nga adlaw sa pagtinir sa ospital sa Roma.
Sa statement sang Holy See Press Office nga gin-release pasado alas tres sa kaagahon oras sa Pilipinas, ginsiling nga wala sang hilanat ang 88-anyos nga Santo Papa kag estable man ang iya nga hemodynamic parameters ukon blood flow.
Suno naman kay Cardinal Matteo Maria Zuppi, head sang bishops conference sang Italya, kun basehan ang report sang Vatican nga nagapamahaw, nagabasa sang peryodiko, kag nakabaton pa sang bisita ang Santo Papa, buot silingon, padulong ini sa full recovery kag amo ini ang ginalauman sang tanan.
Ini nga health update ang natabo kasunod sang reports nga may ginhambalan na si Pope Francis nga nagapati ini nga indi na sini malampasan ang double pneumonia. May reports man nga nagasiling nga may rehearsal na nga ginapatigayon ang Vatican para sa lubong sang Santo Papa.
Pebrero 14 sang gindala ang Pope sa Gemelli Hospital sa Roma kag una nga ginkumpirma nga may bronchitis, apang mas na-alarma ang mga tumuluo sang na-diagnose ang Pope nga may double pneumonia, buot silingon, apektado ang iya duha ka mga baga.
Nahibaluan nga ginkanselar na ang mga appointment kag ulubrahon sang Santo Papa subong nga semana lakip na ang Saturday audience kag Sunday mass sa St Peter’s Basilica.
Indi pa maathag kun makasarang na ini maghatag sang tradisyonal nga Angelus prayer sa Domingo sang udto.
Diri sa Pilipinas, may patigayunon nga Holy Hour sa Manila Cathedral sa Intramuros alas singko karon sa hapon
para ipangamuyo ang pag-ayo sang Santo Papa.
Manguna si Manila Archbishop Jose Cardinal Advincula sa sini nga “Holy Hour for the Healing of Pope Francis” nga kadungan man sang bisperas sang Feast of the Chair of St. Peter.
Gina-agda man sini nga mga Parokya kag komunidad nga mag-organisar man kag mag-upod sa misa, Holy Hour, kag community prayers nga may kaangay nga intensyon.
