Ginatutukan sang Philippine Consulate General sa Los Angeles ang malapad nga operasyon sang imigrasyon nga ginapatigayon sang mga pederal nga otoridad sang Estados Unidos sa madamo nga lugar sa California, nga nagresulta sang kahangawa kag mga protesta sa publiko.
Suno kay Consul General Adelio Angelito Cruz, gina-verify pa sang konsulado ang mga report nga may isa ka Pilipino nga nadakop kaupod sang madamo nga iban pa nga mga raids nga ginpangunahan sang US Immigration and Customs Enforcement (ICE).
Sa inisyal nga report halin sa US federal immigration authorities, isa ka 55-anyos nga Pilipino halin sa Ontario, California, ang nadakpan.
Ginahambal sa report nga may pending nga notice to appear sa immigration court ang amo nga indibidwal, kag una na ini nga nasentensyahan sang apat (4) ka tuig nga pagkabilanggo bangud sang kaso nga pagpangawat, kag sa subong, nagaserbisyo siya sang 37 ka tuig nga sentensya bangud sang kaso nga sexual penetration kag assault nga may tuyo nga paghimulos nga natabo sa syudad sang Pomona.
Ang operasyon sang ICE nga nagsugod sang nagligad nga Biyernes ang nagtuga sang mga protesta sa bug-os nga lugar sang Los Angeles.
Ang mga grupo nga nagaalalay sa mga imigrante kag mga human rights advocates ang nagtipon sa dalanon agud ipahayag ang ila pagpamatok sa ginakabig nila nga sobra kag mapintas nga mga pamaagi sang otoridad.
Nahibaluan nga kapin 2,000 ka tropa halin sa National Guard ang ginpadala sa nagkalain-lain nga bahin sang California, ilabi na gid sa Los Angeles, samtang nagapadayon pa ang mga raids.
Text By: Bombo James Daccer Silverio
