ANTIQUE – Ginkumpirma sang Antique Provincial Government ang labing una nga kaso sang Coronavirus Disease 2019 (COVID-19) sa Antique.
Sa ginpaguwa nga statement ni Gov. Rhodora Cadiao, ang labing una nga COVID-19 patient sa nasambit nga probinsya amo ang 74 anyos nga lalaki, kasado kag tumandok sang Parañaque City, Metro Manila.
Ang nasambit nga pasyente ang nag-abot sa Brgy. Semirara, Semirara Island sa Caluya sang Marso 9 sakay sa private plane kag nagpakunsulta sa Semirara Mining Power Corporation Hospital sang Marso 19 matapos nakabatyag sang hilanat kag kabudlay sa pagginhawa.
Sang Abril 2, ginpaidalom sa test ang specimen kag nakumpirma nga positibo ang pasyente sa SARS-COV-2 nga isa ka causative agent sang COVID-19.
Sa subong, yara na sa estable nga kondisyon ang pasyente kag ginapaidalom sa strict home quarantine samtang padayon naman ang contact tracing.
Samtang, may isa naman man ka COVID-19 case nga na record sa Barotac Nuevo, Iloilo.
Ang pasyente amo ang 25 anyos nga babayi, kag yara naman sa estable nga kondisyon sa hospital.
Bangud sini, naglab-ot na sa 36 ang COVID-19 cases sa Western Visayas.
