Sa labing-una nga tion sa maragtas sang Dinagyang Festival sa Iloilo, may patigayunon nga traslacion ukon ang solemne nga prusisyon sang imahen ni Sr. Santo Niño pakadto sa iya nga iloy nga si Birhen Maria.
Magaumpisa ang event sa misa sa San Jose Parish Church Placer 5:30 karon sa hapon kag pagasundan sang pagdala sang imahe ni Señor Santo Niño paagi sa solemn procession pakadto sa Our Lady of Fatima Church sa Lapuz, Iloilo City.
Magapabilin didto sa Our Lady of Fatima Church ang imahe ni Señor Santo Niño kaupod ang iya iloy nga si Blessed Virgin Mary tubtub nga mag-umpisa ang naka-schedule nga fluvial parade buwas, Enero 24.
Ala una sa hapon buwas, dal-on na ang imahe nanday Sr. Sto. Niño kag ni Birhen Maria sa Philippine Ports Authority (PPA) Bacolod Wharf kun sa diin magasugod ang tradisyonal nga fluvial parade.
Kasunod sang parada, may foot procession nga magadul-ong sang imahe sa Iloilo Freedom Grandstand nga isa sa main venues sang Dinagyang.
Suno kay Fr. Nelson G. Zerda, OSA, parish priest sang San Jose Parish Church, ang traslacion nagatuyo nga mapasangkad pa gid ang spiritual dimension sang Dinagyang.
Ginaduaw sang linibu-libo ka mga tawo ang Dinagyang bangud sa kultural nga selebrasyon kag debosyon kay Santo Niño, kag paagi sa sini nga traslacion, ginapanan-aw sang organizers nga mapadalom pa ang relihiyoso nga aspeto sang festival samtang nagapabilin naman ang mga aspeto nga amo ang naga-ganyat sa local kag foreign tourists.
Sa Enero 25 naman, magapadayon ang selebrasyon paagi sa duha ka oras nga ‘sadsad’ ukon ‘merrymaking’ sa atubang sang San Jose Parish Church alas syete sa gab-i. Pagasundan ini sang pontifical Mass 6:00 sa aga sa masunod nga adlaw.
Magatakop ini nga daku nga kapistahan paagi sa duha ka dalagku nga mga aktibidad nga amo ang Kasadyahan sa Kabanwahanan sa Sabado kag ang Dinagyang Tribes competition sa Domingo.
