Ginmarkahan sang mga labor groups ang Bonifacio Day paagi sa mga protesta agud magpanawagan sang mas manubo nga presyo sang mga nagapanguna nga balaklon, mas mataas nga sweldo, pagtapos sa contractual labor, political dynasties nga ila ila ginakonsiderar nga nangin rason sa mabudlay nga pag-uswag sang ekonomiya.
Lakip sa nag-rally amo ang grupo sang Nagkaisa Labor Coalition agud dumdumon man ang anibersaryo sang pagkatawo sang rebolusyonaryo nga lider nga si Andres Bonifacio, nga ginakilala sang hublag masa sa Pilipinas kag ginakabig nga simbolo sang paghimakas sang mamumugon.
Nagtambong man sa kahiwatan si Gabriela party-list Rep. Arlene Brosas kag ginpanawagan sa gobyerno nga untaton na ang pagbanggi-anay sang mga yara sa mataas nga pwesto kag pasabton na ang mga may sala.
Nagpahayag man ini nga ang mga “trapos” amo dapat ang may “endo” — nga nagapatuhoy sa “katapusan sang kontrata”, isa ka buhat sang pagkuha sang mga mamumugon para sa sunod-sunod nga short term contract nga nagadula sang ila seguridad sa trabaho kag mga benepisyo.
Samtang, lima naman ka pulis ang napilasan bangud sa pagpamilit sang mga raliyista nga magmartsa kag magpatigayon sang mga aktibidad padulong sa Mendiola sa pihak sang pagdumili kag anunsyo nga indi ini freedom park.
Paathag ni P/Maj. Philip Ines, Spokesperson sang Manila Police District, iya ginklaro kun ngaa ginbalabagan nila ang mga rallyista sa Mendiola, Manila nga nagresulta sa pagkasamad sang pila sa magtimbang nga bahin.
Suno kay Maj. Ines, wala sila sang permit nga magpatigayon sang aktibidad sa kaangay nga lugar kag wala ini nalakip sa freedom park.
Nahibaluan nga pila ka mga raliyista ang napilasan matapos nag-engkwentro sa mga kapulisan sa Recto & Legarda Street sa Manila subong nga adlaw sa pagdumdom sang ika-161 nga anibersaryo sang pagkatawo ni Gat Andres Bonifacio.
