Ginpasiguro sang national government nga mapirmahan ang pila ka importante nga mga kasugtanan lakip na ang maritime kag labor cooperation kadungan sang pagbyahe na naman ni President Ferdinand Marcos, Jr. sa Germany kag sa Czech Republic sa masunod nga semana.
Updan ni First Lady Liza Araneta Marcos ang presidente sa iya nga pagbisita sa Berlin kag Prague halin sa Marso 11 tubtub sa 15.
Suno kay Department of Foreign Affairs (DFA) Assistant Secretary Maria Elena Algabre sang Office of European Affairs, ini nga mga kasugtanan sa maritime sector cooperation kag technical and vocational education and training ang natalana nga pirmahan sa tunga sang transportation sectors sang Pilipinas kag Germany.
Pahayag sang opisyal, para ini sa pag-facilitate sa maritime trade kag mobility sang mga commercial vessels nga ginapanag-iyahan sang duha ka nasambit nga pungsod.
Natalana man nga maghimo sang deal ang Technical Education and Skills Development Authority (TESDA) sa cooperation program kaupod sa German Federal Institute for Vocational Education and Training kun sa diin tuyo nga padayunon ang partnership sa technical kag vocational education and training.
Magluwas diri suno sa iya, pasangkadon man sang duha ka pungsod ang labor cooperation ilabi na bangud may agreement anay ang Pilipinas kaupod sa Berlin sa Triple Win Program agud nga mabuligan ang problema sa kakulangan sang mga nurse sa Germany.
Sa Czech Republic naman, ginalauman nga masaksihan ang pagpirma sa joint communiqu kaangot sa pag-establisar sang labor consultation mechanisms para sa safe nga migration sang mga Pinoy workers amo man ang paghatag sang mataas nga proteksyon sa ila nga mga kinamatarong.
Una naman nga nagpahayag sang interes ang amo nga pungsod nga mag-hire sang dugang nga mga Pilipino para nga makasulod sa nagkalain-lain nga trabaho.
Umpisa Mayo suno sa iya, ginpasaka na sang Czech Republic ang yearly quota para sa Filipino workers halin sa 5,000 tubtub sa 10,000.
Ini nga byahe ni Marcos sa Europa ang kasunod sang iya magkasunod man nga byahe sa Canberra kag Melbourne, Australia para sa state visit kag pagtambong sa isa ka special summit kaupod sa iban nga Southeast Asian leaders.#
