Nakakita ka na bala sang tawo nga ginahimo nga hobby ang pagsimhot sang sapatos sang iban?
Kun abyan mo ini kag daw ginahimo niyo nga sunluganay, daw okay lang para sa iban… pero ano abi kun indi mo kilala?
Amo ini ang natabo sa Greece sang isa ka 28-anyos nga lalaki ang ginreklamo gid sa pulis bangud sa indi kinaandan sini nga ginahimo.
Isa ka adlaw subong nga Oktubre, naaktuhan sang kasilingan ang lalaki nga nagasimhot gid sa ila sapatos nga ginbilin sa guwa sang ila balay.
Indi ini una nga bes nga natabo nga nag-trespass gid ang lalaki sa pribado nga propiedad para nga mapalapitan lang ang sapatos kag mahaklo ang baho sini.
Bangud ginkulbaan ang tag-iya, gintawag ang pulis kag nakalab-ot pa sa pagpasaka sang reklamo.
Sa atubang sang korte, ginrason sang lalaki nga indi man niya mapaathag kun ngaa nahimo niya ini.
Nahuya man ini sa iya ginahulag kag nagpasalig nga magapangayo siya sang bulig sa eksperto agud ma-check siya bangud sigurado siya nga isa na ini ka balatian.
Gin-ako man sini nga tatlo ka beses na siya nga nagsulod sa propiedad sang iya kasilingan para sa amo gihapon nga rason.
Pahayag pa sini, wala gid siya sang tuyo nga maghimo sang halit sa iban nga tawo. Nagasanto man ini sa report sang mga tawo sa palibot nga wala gid man ini nangin bayolente bisan isa lang ka bes.
Bisan indi siya agresibo, ginpatawag gihapon sang 60-anyos nga kasilingan ang pulis bangud gusto man sini nga buligan ang lalaki nga atubangon ang iya kondisyon kag magpangayo na sang bulig sa propesyunal.
Sa pagkamatuod, mangin ang iban gali nila nga kasilingan ang naka-eksperyensya man sang amo nga indi ordinaryo nga hitabo sang nagligad nga anum ka bulan kag ang lalaki amo gihapon ang ginatudlo nga may kahimuan.
Nag-desisyon naman ang Single-Member Misdemeanor Court of Thessaloniki nga mag-isyu sang suspended sentence nga isa ka bulan sa presuhan kag tatlo ka tuig nga probation batok sa lalaki.
