ILOILO – Patay ang duha ka lalaki matapos nakuryente sa Brgy. Nabitasan, Leganes, Iloilo, Agosto 12.
Ang mga biktima amo sanday Arjun Selecia, 27 anyos, kag si James Karl Zarragosa, 18 anyos, lunsay residente sang Brgy. Bagumbayan, San Joaquin, Iloilo.
Sa interview sang Bombo Radyo kay Loreto Selecia, tiyo ni Arjun, iya ginpahayag nga nagatrabaho ang duha sa isa ka ihawan sang manok sa amo nga barangay.
Subong nga adlaw kuntani maga-umpisa sa trabaho si Arjun.
Suno naman kay Pssg. Emmanuel Maude, imbestigador sang Leganes Municipal Police Station, kaagahon na sang nag-video call si James Carl apang mahina ang signal sa lugar rason nga nagsaka ini sa atop nga ginatungtungan sang transformer.
Kaupod sini nga nagsaka sa atop si Arjun kag isa pa ka upod nga si Angelo.
Sa malain nga palad, nasalapay sini ang live wire kag nagtapik rason nga maabtik man nga nagbulig si Arjun apang nakuryente man.
Nangayo sang bulig si Angelo kag sang ginpadulungan sang iban nga mga upod, nakit-an nga itom na ang panit sang duha, gision ang panapton, kag wala na sang kabuhi.
Ginpahayag pa sang pulis nga pag-abot nila sa lugar, naga-padayon pa ang video call kun sa diin nakit-an nga Pinay nga yara sa Bahrain ang kaistorya ni James Carl kag wala man sang hinalung-ong ang amo nga babayi nga nakuryente na ang iya kaistorya sa pihak nga linya.
