Isa ka maayo nga paagi sa pag-develop sa aton ihibalo amo ang pagbasa adlaw-adlaw.
Ikaw, pila ka oras ang imo ginapain para nga makabukad ikaw sang libro ukon makapangita sang maayo nga content nga imo mabasa online?
Sa Nigeria, isa ka lalaki ang ginakilala subong nga amo ang naga-uyat sang pinakamalawig nga marathon sa bug-os nga kalibutan kun pagbasa sang matunog ang pagahambalan.
Ini amo si Samson Ajao, 27, residente sang Osogbo sa amo nga pungsod sa Africa nga nakabasa sa sulod sang 215 oras ukon isa ka oras na lang antes eksakto magtupa sa siyam ka adlaw!
Naguba sini ang anay record nga 124 ka oras nga gin-set sang 2022 ni Rysbai Isakov sang Kyrgyzstan.
Sa sini nga challenge, dapat nga sige-sige ang pagbasa sa libro kag wala dapat sang masobra sa 30 segundos nga pag-untat sa kada item nga ginabasa.
Kabug-usan nga 100 ka libro ang gingamit ni Samson lakip na ang subjects sa finance, sales, management, leadership, politics, health kag mental wellness.
Suno sa iya, ginhimo niya ini agud nga ma-promote ang literacy development kag ma-inspire ang reading culture sa Nigeria.
Bilang pagsulundan sa pinakamalawig nga marathon records, ginhatagan man si Samson sang tag-lima ka minutos nga pahuway sa kada matapos ang isa ka oras nga pagbasa — ukon buot silingon, duha ka oras lamang nga pahuway sa isa ka adlaw.
Sa sini nga breaktime lamang mahimo makatulog, makakadto sa bathroom, ukon makailis ang tawo nga naga-readathon.
Suno kay Samson, wala gid siya nagtulog-tulog sa iya break.
“Even when it’s tough, you have to get going to meet your target,” pahayag sini sa interview sa NTA News base sa report sang Guinness World record.
Antes ang record attempt, may abiso pa nga nakuha ang natungdan sa medical professionals kun ano nga pagkaon kag ilimnon ang iya dal-on kag paano halungan ang iya tingog amo man ang pag-minimize sang toilet break.
Pagkatapos nga nagmadinalag-on sa iya attempt sa Guinness, nagparada pa si Samson kag ang iya supporters lakip ang iya ginikanan bilang selebrasyon sa iya pinasahi nga nahimo.
Ini nga record ang may yara sang manggaranon nga maragtas. Sang 1987, ang Englishman nga si Adrian Hilton ang ginkilala man bangud sa pag-recite sini sa complete works ni Shakespeare sa “bard-a-thon” nga naglawig sang 110 hours kag 46 minutes.##
