Isa ka bag-o ginbun-ag nga lapsag ang gin-kidnap sang isa ka nagpakuno-kuno nga nurse sa South Cotabato Provincial Hospital sa Koronadal City.
Base sa imbestigasyon, nagsulod ang suspek nga nagasuksok pa sang medical service attire sang isa ka nurse sa sulod sang ospital kag ginkuha ang baby.
Suno sa iloy sang bata, ginhambalan sila sang suspek nga ipaidalom sa hearing test ang bata apang wala na ginbalik.
Ginpahayag nga ginsulod sang suspek ang bata sa bag pagwa sa ospital.
Sa pagpangita naman sang otoridad, narekober ang bata sa sulod sang isa pa ka ospital nga amo ang Dr. Arturo Pingoy Medical Center sa Koronadal City samtang ginakugos sang isa ka babaye nga ginapahayag nagasuprir sang postpartum depression.
Nagapangatubang subong sang kaso nga kidnapping ang babaye nga nagkidnap sa bata.
