Ginbasura sang Iran ang ginaduso nga ceasefire sa tunga nila sang Israel kag Estados Unidos sang Amerika.
Gin-report ini sang state media apisar nga nagahingapos na ang latid nga ginhatag ni US President Donald Trump.
Pahayag sang state media, napalab-ot na nila ang ila sabat sa key mediator nga Pakistan.
“Iran has conveyed to Pakistan its response to the American proposal to end the war,” suno sa news agency nga IRNA. “In this response -– set out in ten points –- Iran… has rejected a ceasefire and insists on the need for a definitive end to the conflict.”
Sa separado nga pahayag ni Mojtaba Ferdousi Pour, head sang Iranian diplomatic mission sa Cairo, ginsiling sini nga indi lang basta-basta nga ceasefire ang ila luyag. Ang gusto siguraduhon sang Tehran suno sa iya amo ang pagtakop sang gyera nga may garantiya nga indi na sila pag-atakehon liwat.
“We won’t merely accept a ceasefire,” pahayag sang amo nga opisyal sa The Associated Press. “We only accept an end of the war with guarantees that we won’t be attacked again.”
Matandaan nga nagpaandam si Trump nga itapok sini ang Iran sa impyerno pananglitan indi magsugot sa negosasyon.
Gusto ni Trump nga buksan ang Strait of Hormuz; kun indi, suno sa iya, maga-atake ang US sa mga power plant kag sa mga taytay sang Tehran.
Samtang nga padayon ini nga bayluhanay sang paandam, nag-atake naman ang Israel sa daku nga petrochemical plant sa South Pars natural gas field kun sa diin napatay ang duha ka paramilitary Revolutionary Guard commanders.
Nagpadayaw ang Israel nga ang ila ginhimo nga atake ang mahimo makadula sang major source sang revenue para sa Iran, bangud ang amo nga gas field ang kritikal para sa electricity production. Gintawag man ni Israeli Defense Minister Israel Katz ang amo nga planta bilang largest petrochemical facility sang Iran.#
