ILOILO CITY – 18 ka tuig ang ginhulat sang 2022 Bar Examination Passer nga si Von Superio antes malab-ot ang handom nga mangin abogado.
Ini matapos nga napaslawan ini nga makapasar sa pasinawan sang 2004 kag ginpili nga magtrabaho anay sa Iloilo Provincial Capitol kag ginsudlan ang nanari-sari nga work positions.
Sa interview sang Bombo Radyo kay Ruel Von Superio, Acting Head sang Iloilo Provincial Population Office, iya ginpahayag nga indi nangin mahapos ang iya pagpanglakaton antes makapasar bangud ini ang nag-atubang sang kaso nga administratibo kag na-suspend sa iya trabaho sang anum ka bulan.
Suno kay Operio, indi upang ang pagka-suspend sini sa trabaho, sa baylo, nangin kahigayunan ini agud makatutok ini sa pagtuon.
Sa matuod suno sa natungdan, nag-back to zero ini sa iya review bangud madamo sang mga layi na gin-ammend, rason nga kinahanglan sini nga mangin maukod sa pagtuon.
Sa subong, bangud sa paghimakas kag pag-sakripisyo, tuman ang kalipay nga nabatyagan ni Superio matapos nga nakit-an nga nagbunga ang tanan sini nga kabudlay kag ginbayluhan sang grasya.
Samtang, tuman ang pagpasalamat ni anay ‘Bombohanay sa Gab’i’ Anchor Joseph “Jong” Gotera sa tanan nga kabahin sang Bombo Radyo Iloilo bangud sa tanan nga leksyon nga gintudlo sa iya nga mapinuslanon sa iya pagpanglakaton sa law school tubtub nga nakapasar man sa Bar exam.
Sa interview sang Bombo Radyo kay Gotera, iya ginpahayag nga dako nga bulig ang tanan nga natun-an sini bilang news writer kag newscaster bangud nagamit niya ini agud mahangpan ang materials sa iya review.
Suno kay Gotera, ginkalipay sini ang kahigayunan nga kun ini ang masami nga nagapamangkot sa mga interviewees, siya na subong nangin topiko sang programa.
Ginpahayag sang natungdan nga sikreto sini sa iya kadalag-an amo ang ‘time management’ kag disiplina sa kaugalingon nga una niya natun-an sa Bombo Radyo.
