CARLES, ILOILO- Nagreklamo ang isa ka concerned citizen matapos ginpahayag nag-abot sa isla Gigantes ang walo ka mga yate sa diin sakay ang mga businessman gikan sa Cebu.
Sa interview sang Bombo Radyo kay Alyas Nonoy, iya ginpahayag nga naalarma sila bangud sa pag-abot sang amo nga sakayan.
Suno kay Nonoy ginapasuni nagpaligo ang pila ka sakay sang yate sa Isla, apang sang ulihi ginpahalin ang mga ini sang katapo sang Philippine Coast Guard.
Pahayag pa ni Nonoy, nabalaka lang siya bangud sila sa Carles kag sa Isla Gigantes ang nagahalong, sa diin wala sang narekord nga kaso sang COVID-19 .
Samtang, nagpaathag ang alkalde sa banwa sang Carles, Iloilo bangud sa ginapahayag pag-abot sang walo ka yate sakay ang pila ka tawo sa Isla de higantes.
Sa interview sang Bombo Radyo kay Carles Mayor Siegfredo Betita, iya ginpahayag nga ang mga sakay sang mo nga yate, amo ang nga businessman gikan sa Cebu, nga may plano nga mag-invest sa Isla Gigantes.
Pahayag pa ni Betita, antes pa sang Coronavirus disease 2019 ang iya imbitasyon sa amo nga mga negosyante, agud kuntani mag-invest kag madevelop man ang ila banwa.
Ginpahibalo niya suno kay Betita ang coastguard, kag ang mga punongbarangay sa pag-abot sang mga businessmen.
Gin-athag man niya suno sa natungdan, nga wala nagpanaog sa yate ang amo nga mga businessman bangud nahisugtan sang duha ka kampo nga mahimo ang mga ini makalabay sa Isla apang indi lang ang mga ini magpanaog.
Nagapangayo siya sang pasaylo suno kay Betita kun nagpanic ang mga pumuluyo bangud sa pag-abot sang walo ka mga yate sakay ang mga businessman.
