ILOILO CITY — Suportado sang mga punong barangay sang Distrito sang Jaro ang kandidatura ni Iloilo City Mayor Jerry Treñas kag sang anak sini nga Raisa Treñas-Chu sa palaabuton nga 2025 elections.
Sa interview sang Bombo Radyo kay Punong Barangay Rodel Mamon, Presidente sang Liga ng mga Barangay sang Jaro District, iya ginpahayag nga ang 40 ka mga punong barangay sang Jaro nga nagtambong sa ginpatigayon nga Local Development Council Meeting ang naga-suporta sa Team USWAG ni Treñas.
Suno kay Mamon, sa kabug-usan nga 42 ka mga punong barangay sa Distrito sang Jaro, duha ang absent lakip ang iloy ni Iloilo City Lone Dsitrict Representative Julienne “Jamjam” Baronda nga punong barangay sang Javellana, Jaro.
Ginpahayag man ni Mamon nga ginkakibot nila ang pag-anunsyo ni Treñas sang kandidatura sang iya anak sa pagka-kongresista apang nagpasalig man ini nga suportahan ang plano sang alkalde.
Matandaan nga sang damlag lang, nagpakita man sang suporta ang Liga ng mga Barangay sang Distrito sang La Paz kay Treñas para sa 2025 elections.
