Gina-engganyo sang Iloilo Provincial Government ang mga Ilonggo nga mag-upod sa obserbasyon sang Earth Hour 2026 kun sa diin ilabi nga pabaloran ang pagkinot sang kuryente.
Ginapangabay ang pagpatay sang non-essential lights ukon indi man kinahanglanon nga mga suga sa sulod sang isa ka oras halin 8:30 p.m. tubtub 9:30 p.m. bwas, Marso 28.
Sa interview sang Bombo Radyo kay Mitzi Peñaflorida, head sang Environmental Programs and Management Services Division sang Provincial Environment and Natural Resources Office (PGENRO), iya ginpahayag nga ginpalab-ot na nila ini nga panawagan tubtub sa kabanwahanan, kabarangayan, kag mangin sa mga balay kag establisyemento.
Magluwas sa pagpatay sa mga suga, may ginpreparar man nga programa kag nagkalain-lain nga mga aktibidad sa Iloilo Provincial Capitol nga magasugod naman alas singko sa hapon. Paga-updan ini sang health office, Sangguniang Kabataan, Red Cross, water districts, kag iban pa.
Sa mga magatambong sa event sa Kapitolyo, mahimo makapa-rehistro alas kuatro sa hapon. Ang kada participant gina-require nga magdala sang liso ukon seedling sang native ukon fruit-bearing tree bilang suporta naman sa “Tanum Iloilo” program sang probinsya.
Nahibaluan nga ini na ang pang-apat nga tuig sang “Ligum-Dulom” celebration sa Iloilo.
Ang dululungan nga pagpatay sang non-essential electricity kag equipment amo ang pagpakita sang simboliko kag importante nga akto sang pagkinot kag pagbulig sa kalibutan.
Ginsuguran sang World Wide Fund for Nature ang obserbasyon sang Earth Hour sang 2007 tubtub nga nangin isa ini ka global environmental campaign nga gina-updan sang minilyon ka mga tawo nga nagapatay sang ila mga suga sa sulod sang isa ka oras agud nga mapasangkad pa ang ihibalo natuhoy sa climate change.
Ginalantaw man sang kadam-an nga labi pa nga importante ang partisipasyon sa Earth Hour subong nga tuig ilabi na bangud sang nagakatabo nga energy crisis sa madamo nga mga pungsod.
“More than an hour of darkness, it is a powerful reminder that small actions, when done together, create lasting impact for our communities and future generations. Take part in it! Turn off your lights, gather your family, and stand with Iloilo in making a difference,” kabahin pa sang pagpangagda sang Iloilo Provincial Government.#
