Gintuyo sang pila ka mga senador nga kumbinsehon si Senator Loren Legarda nga magbulos bilang Senate President.
Suno kay Senate President Vicente Sotto III, si Legarda nga halin man sa majority amo mismo ang nagpanugid sa iya sang sini nga impormasyon. Apang suno kay Sotto, nagpasalig si Legarda nga indi ini interesado sa amo nga posisyon.
Sa inisyal nga impormasyon halin kay Legarda suno kay Sotto, ang minority senators ang nagpalapit sa iya agud nga kumbinsehon siya. Wala man ginhingadlan kun sin-o halin sa minority ang nagpanguna sa amo nga tuyo nga kudeta.
Una na nga nag-ako si Senate Minority Leader Alan Peter Cayetano nga may mga diskusyon nga islan ang liderato sa Senado, apang sa subong, indi pa nila makumpleto ang numero bangud wala pa sila nakalab-ot sa 13.
Gindepensahan naman ni Senate President Pro Tempore Panfilo Lacson si Legarda sa tunga sang nagguwa nga mga impormasyon kasunod sang pagpamalibad sini nga magpungko bilang Senate leader.
Suno kay Lacson, sang napaslawan ang gintuyo nga kudeta, ginbaliskad sang iban ang lamesa kag ginpalapta ang istorya nga nag-boluntaryo si Legarda agud nga buligan ang iban nga mga senador nga magtipon sang suporta agud kakason si Sotto bilang Senate chief.
Pahayag pa ni Lacson, lunsay malisyoso ini nga mga naratibo nga nagalapta.
Una na nga ginpahayag ni Sotto nga nagapabilin nga “solid” ang majority bloc apisar sang ginatan-aw sang iban nga posibilidad nga magabalhin si Legarda sang iya nga suporta. Pahayag pa ni Sotto, may isa tubtub duha pa gani ka mga senador nga indi myembro sang majority bloc nga possible mag-upod sa ila.#
