Nanindugan si Senator Loren Legarda nga wala siya sang ihibalo kaangot sa proposal nga himuon siya nga Senate President antes magtakop ang 20th Congress.
Suno kay Legarda, wala man siya sang ideya sa nagalapta nga impormasyon nga may term sharing ukon power sharing arrangement sa tunga nila ni incumbent Senate President Tito Sotto III.
Una na nga ginpahayag ni Sotto nga napunggan sang majority bloc ang tuyo nga kakason siya sa pwesto.
Wala sini gindetalye kun paano nila napunggan ang kudeta, apang ang namensyonar sini nga plano amo nga i-eleher si Legarda bilang una nga babaye nga Senate President pagkatapos sang 2027 budget.
Gindugang sini nga wala ini nagakahulugan nga maga-share sila sang termino, bangud indi man patas ang ila tyempo sa pagpungko bilang lider sang Senado.
Depensa naman ni Legarda, wala siya nagakomento sa mga impormasyon nga wala man napahibalo sa iya.
Una naman nga nagdistansya ang mga senadora sa mga pamangkot kun gintanyagan gid man siya sang minority bloc nga magbulos bilang Senate President apisar nga parte siya subong sang majority.
Siya ang nag-preside antes nagtakop ang plenary session sang Myerkules. Gintawag pa siya ni Majority Leader Miguel Zubiri bilang “Madame President” nga amo pa ang nagpatunog sang huring-huring sang kudeta.#
