Ginpasalig sang Iran nga paagyon sini nga hilway sa katalagman ang mga barko sang Pilipinas kag ang Filipino seafarers sa Strait of Hormuz.
Nakuha ni Foreign Affairs Secretary Theresa Lazaro ang commitment paagi sa iya pagtawag kay Iranian Foreign Minister Seyed Abbas Araghchi.
Suno sa Department of Foreign Affairs (DFA), nagpromisa ang Iran nga tugutan sini nga maglabay nga wala sang obstruction ukon indi pagbalabagan ukon pagbombahan ang mga barko kag energy shipments sang Pilipinas kag ang tanan nga Filipino seafarers.
“During the call, the Iranian Foreign Minister assured the Secretary that Iran will allow the safe, unhindered, and expeditious passage through the Strait of Hormuz of Philippine-flagged vessels, energy sources, and all Filipino seafarers,” suno sa statement sang DFA.
Dugang sang ahensya: “These assurances from Iran will greatly facilitate the steady delivery of critical oil and fertilizer supplies to the Philippines.”
Isa ini ka daku nga development nga ginahulat sang Pilipinas agud nga mapahagan-hagan ang krisis sa enerhiya nga tuga sang masobra isa ka bulan na nga gyera sa Middle East.
Gina-import sang Pilipinas halin sa Middle East ang 98% sang krudo nga ginagamit sini, gani nga tuman man ka daku ang epekto halin sang ginsiradhan sang Iran ang Strait of Hormuz sa temprano nga bahin sang Marso.
Suno pa sa DFA, bangud sang pasalig sang Iran, ginalantaw nga mangin steady na ang pag-deliver sang langis kag fertilizers supplies sa Pilipinas.
Nahibaluan nga may amo man sini nga kasugtanan ang Iran sa iban nga mga pungsod sa kondisyon nga indi lang sila magpasilabot sa gyera.
Sang Marso 26, matandaan nga nag-anunsyo ang Foreign Ministry sang amo nga pungsod nga tugutan nila nga makalabay sa Strait ang mga barko halin sa China, Russia, India, Iraq, kag Pakistan.#
