ILOILO CITY – Nagapati ang mga opisyal sa Brgy. Zamora Milleza, Iloilo City Proper nga makabawi na sila sa ikaduha nga kahigayunan sa ginapatigayon nga Oplan Hawan.
Ini matapos nga isa ang nasambit nga barangay sa nangin low-compliant sa road clearing operation sa syudad sang Iloilo sa diin naka-score lang ini sang 66 percent santo sa nauna nga evaluation sang Department of the Interior and Local Government (DILG).
Sa interview sang Bombo Radyo kay Punong Barangay Peter Abadiano, iya ginpahayag nga sa subong, ginahulat na lang nila nga mapirmahan na sang DILG ang ordinansa nga ila ginpasa kag kun matabo, maka-umpisa na sila sa pagtinlo sa mga obstructions sa sabado, Pebrero 22.
Gin-ako man sang natungdan nga madamo sila sang nangin kakulangan sa una nga hugnat sang road clearing operation.
Una, suno sa opisyal, wala sila nakapasa sang documentation ukon ang mga picture para sa BEFORE, DURING, kag AFTER sang ginpatigayon nga pagpanglimyo.
Ikaduha, sang tion nga ginhimo ang evaluation, naula ang basura gikan sa truck sa ila barangay amo nga kit-anon gid ini sa karsada.
Ikatatlo, wala man nakapahamtang ang barangay sang mga road signages kaangay sang NO PARKING.
Ikaapat, suno kay Abadiano, resolution lang ang ila ginhanda kag indi barangay ordinance nga amo gid kuntani ang kinahanglan para maimplementar ang road clearing.
Ginpasalig man ni Abadiano nga mas maathag na sa ila subong ang parametro sang DILG gani nakahibalo na sila kun ano ang ila himuon sa sulod sang 75 ka adlaw.
