Panibag-o nga banas ang usuyon sang Choco Mucho team captain nga si Maddie Madayag nga magahampang na sa Japan matapos nagpirma sa Kurobe Aqua Fairies sang Japan SVLeague.
Ini ang ikaduha nga professional team ni Madayag halin sang nag-graduate siya sa Ateneo Blue Eagles sang 2019.
Ginkumpirma man ini mismo sang Flying Titans kag nagpadala man sang mensahe sang “good luck” para kay Maddie.
“Join us in sending our captain, Maddie Madayag, all the best as she takes on Japan with the Kurobe Aqua Fairies!” kabahin sang ila Instagram post. “We’re incredibly proud of you, Maddie, for seizing this amazing opportunity in your career. Your Choco Mucho Flying Titans fam is with you every step of the way. We can’t wait to welcome you back stronger than ever!”
Siya ang ikatatlo nga Filipina nga nakasulod sa Japanese volleyball circuit kasunod kanday Alas Pilipinas skipper Jia de Guzman (Denso AiryBees) kag Jaja Santiago (JT Marvelous).
Sang nagligad lamang nga bulan, nakuha na ni Santiago ang iya Japanese citizenship kag ginakilala na subong nga si Sachi Minowa. Nagahilapit na ini sa iya handum nga makahampang sa Summer Olympics.
Sa pihak nga bahin, nangin pigado ang performance sang Choco Mucho sa 2024 PVL Reinforced Conference standings bangud nakaupod ang ila star players nga sanday Sisi Rondina kag Cherry Nunag. Nagpang-siyam sila sa 12 teams nga may 2-6 record binulan lang matapos ang ila ikaduha nga sunod-sunod nga All-Filipino runner-up finish.
