Kumpleto na ang walo ka mga pelikula nga magapasundayag sa 52nd Metro Manila Film Festival (MMFF) 2026.
Ini matapos gin-anunsiyo subong nga adlaw, Oktubre 12, ang apat pa ka pelikula sa ikaduha nga batch sang Magic 8.
Lakip sa bag-o nga entries ang historical drama nga “Los Salvajes Bravos,” family drama nga “Little Hope,” biographical documentary nga “Seeds of Peace: The Life of Fr. Rhoel D. Gallardo, CMF,” kag romantic drama nga “A Perfect Marriage.”
Sa “Los Salvajes Bravos,” mangin bida sanday Romnick Sarmenta kag Ruru Madrid, samtang sanday Yassi Pressman kag Pepe Herrera naman ang balantayan sa “Little Hope.”
Malantaw naman sa “Seeds of Peace” ang kabuhi, misyon, abduction, kag martyrdom ni Father Rhoel Gallardo, isa ka Claretian missionary nga ginpatay sa Basilan. Mangin star si Zaijian Jaranilla sa amo nga biographical meta-documentary.
Samtang, magkaupod liwat sanday Kim Chiu kag Paulo Avelino sa “A Perfect Marriage” sa idalom sang direksyon ni Dan Villegas.
Nagdugang ang apat ka pelikula sa una nga batch nga gin-anunsiyo sang Hulyo 7 nga ginalakipan sang “2nd Miracle in Cell No. 7,” “Amir,” “Haunted Carnival,” kag “The Greatest Showdown.”
Sa una nga higayon, duha na ang mangin lokasyon sang Parade of Stars.
Maga-host ang Bacolod City sang parada sa Disyembre 12, samtang magabuligay ang San Juan City kag Mandaluyong City sa pag-host sang parada sa Metro Manila sa Disyembre 18.
Ginlimitahan sa P299 ang pinakamataas nga presyo sang ticket agud mas madamo ang makalantaw sang mga pelikula nga Pilipino kadungan sang Paskwa.
Gintalana naman sa Disyembre 2 ang Gabi ng Parangal ukon awards night sang festival.# (Photo: Jolo Flores Reviews)
