Sa tunga sang nagapadayon nga pandemya, madamo sang nagalimita sang aton nakaandan na aktibidad.
Isa na diri amo ang pag-inom sang makahulubog nga ilimnon sa pampubliko nga lugar bangud sa masami nga pagpatuman sang liquor ban tuga sang istrikto nga quarantine restrictions.
Apang didto sa Hinkley, Illinois sa Estados Unidos, may pinasahi nga pamaagi sa pag-inom sang makahulubog nga ilimnon.
Kag ini amo ang pagkaon sang ice cream nga himo sa alcoholic beverage sa diin halos wala sang may makapakot nga ang imo gina-uyatan ang himo sa isa ka sahi sang makahulubog nga ilimnon samtang ginakaon mo ini sa pampubliko nga lugar.
Ini ang gin-imbento ni Will Rogers, tag-iya sang isa ka ice cream shop.
Suno kay Rogers, gamit ang iya gin-imbento nga Below Zero machine, makahimo siya sang ice cream gamit ang beer, cocktails, kag iban pa nga sahi sang ilimnon.
Nadiskubrehan ini ni Rogers sang naga-eksperimento siya sa paghimo sang highly-caffeinated espresso flavor ice cream sa diin narealisar niya nga ang iya gingamit nga technique, ang mahimo man niya nga tilawan sa paghimo sang ice cream gamit ang alcoholic beverages.
Pahayag sang ice cream maker, ginabanta 30 ka minutos ang kalawigon agud mangin ice cream form ang alcohol content drinks.
Madamo naman sang bars kag breweries ang nagka-interes sa pinasahi nga ice cream machine nga gin-gamit sang imbentor.
