Pormal na nga gintugyan sa Pilipinas ang chairmanship sang Association of Southeast Asian Nations (ASEAN).
Ini nagakahulugan nga sa bilog nga tuig 2026, ang Pilipinas ang maga-host sang ginatos ka mga pagsinapol kag aktibidad tubtub sa 48th kag 49th ASEAN summits kun sa diin magatipon na naman ang mga lider halin sa regional bloc kag ang ila nga dialogue partners.
Magluwas sa hosting, ang ASEAN Chairman amo ang may katungdanan nga mag-giya kag magkontrol sang regional discussions sa bilog nga tuig.
Opisyal nga ginhatag sa Pilipinas ini nga obligasyon sa pagtakop sang 47th ASEAN Summit and Related Summits sa Kuala Lumpur, Malaysia. Sa amo nga seremonya, nagpanguna ang former chair nga si Malaysian Prime Minister Anwar Ibrahim kag ang nagbaton naman amo si President Ferdinand Marcos Jr.
Pahayag ni Marcos, preparado na ang Pilipinas halin pa sang nagligad nga walo ka bulan.
“We, as Asean, will stand firm as the institution that serves as the driving force behind the region’s evolving landscape. Our goal is not to diverge from past chairships, but to build upon the collective work of our predecessors,” suno sa presidente.
Nagpain ang Pilipinas sang masobra sa P17.5 billion para sa mga obligasyon sini bilang host sa 2026, magluwas pa sa P5.4 billion nga ginpain sini sang 2025 sa preparasyon pa lamang para sa ASEAN chairmanship.
Isa sa prayoridad sa 2026 suno kay Marcos amo ang Code of Conduct para sa West Philippine Sea.
Matandaan nga nagpahayag anay ang Department of Foreign Affairs (DFA) nga nagsugtanay ang ASEAN member states kag ang China nga tapuson ang nasambit nga Code of Conduct sa 2026. Pahayag ni Marcos, nagalaum siya nga ma-finalize na gid ini sa 2026 kag kun matapos na, imbitaron sini si Chinese President Xi Jinping sa Manila para nga makapirma ini.
Nahibaluan nga katapusan nga nangin chair ang Pilipinas sa ASEAN sadtong 2017.#
.){kind=link}