Nagwangal ang pila sa mga manugbaligya sa Iloilo Terminal Market ukon sa Super nga mapatay na sila sa gutom antes pa man ang pagbukas sang newly-developed nga merkado sa Oktubre 30.
Sa interview sang Bombo Radyo kay Jun nga may yara sang kapehan sa temporary stall sa amo nga market, iya ginpahayag nga wala sila sang sayluhan kag pat-od nga ma-penitensya sila kasunod sang pag-demolish sa ila pwesto.
Suno sa iya, wala gid sila sang mangin income tubtub nga indi sila makaplastar sa bag-o nga merkado. Pahayag sini, wala man lang sila napahibalo sang maayo antes ang demolisyon.
“Mapatay kami anay guro antes kami butangan sang pwesto,” suno kay Jun. “Tan-awa bala sitwasyon namon hu. Mapenitensya gid guro kami ni anay,” pahayag pa sini.
Ginsugid man sini nga indi kuntani magnubo sa P600 ang iya income sa kada adlaw kag amo lang ini ang iya palangabuhian.
Ang demolisyon sang mga stalls nagsugod sang Oktubre 14 kun sa diin ginpang-kakas ang mga atop kag istruktura agud mapreparar ang lugar para sa pagbukas sang merkado.
Una na nga gin-anunsyo sang Iloilo City Government nga patigayunon sa Oktubre 30 ang opening sa gin-develop nga Terminal Market kag Central Market.#
