Ginpanindugan ni Senador Rodante Marcoleta nga wala siya nahadlok kay anay House Speaker kag subong Leyte 1st District Representative Martin Romualdez.
Kasunod ini sang pagdala ni Marcoleta sang isa ka surprise witness sa hearing sang Senate Blue Ribbon Committee nga si anay Philippine Marines Technical Sergeant Orly Regala Guteza. Si Guteza ang nagbuyagyag nga ginapa-deliver siya sang “basura” ukon ang milyon-milyon nga kantidad sang kwarta nga ginbutang sa mga maleta kag gindala sa balay ni anay anay Congressman Zaldy Co kag ni Romualdez.
Suno kay Marcoleta, isa lang ang tuyo sang imbestigasyon nga amo ang pagtudlo kon sin-o ang utok sa likod sang anomaliya sa flood control projects.
Ginpahayag man sang senador nga posible nga madamo sa mga senador ang nahadlok kay Romualdez, apang ginpahayag sini nga wala siya nalakip diri.
“Iisa ang layunin natin dito, yung matukoy natin kung sino ang mayroong utak dito na ngayon unti-unti na naihayag. Sino ba ang natatakot kay Martin Romualdez? Marami po siguro dito sa kapulungang ito. Pero hindi ako natatakot kay Martin Romualdez,” suno sa Duterte ally.
Matandaan nga pagkatapos nga nagtestigo si Guteza sa Senado, gilayon ginpanginwala sang abogada nga si Atty. Petchie Rose Espera nga siya ang nag-notaryo sang testimonya ni Guteza.
Sa amo man nga Senate plenary session kahapon, naghatag man sang privilege speech si former Senate President Chiz Escudero nga nagatudlo kay Romualdez nga amo ang mastermind sa flood control issue nga gintawag sini nga sarswela. Nagsabat naman ang former House Speaker kag gintawag ini nga DDS script.#
