Nagpaguwa na ang Court of Appeals (CA) sang freeze order sa bank accounts, properties, kag air assets sang mga kontraktor kag duha ka mga kongresista nga naangot sa maanomaliya nga flood control projects.
Suno kay President Ferdinand Marcos Jr., sakop sang order ang accounts kag assets sang Silverwolves Construction Corporation kag Sky Yard Aviation Corporation.
Sakop man sini suno sa iya ang personal nga mga account kag asset sang mga indibidwal nga gina-imbestigaran subong lakip sanday Benguet Representative Eric Yap kag iya utod nga si ACT-CIS party-list Rep. Edvic Yap.
“Kailangan natin ang mga freeze order na ito para hindi maibenta ang mga ari arian at para maibalik natin sa ating mga kababayan ang bawat pisong pinaghihinalaang ninakaw,” suno kay Marcos sa iya video report nga ginpaguwa kaina sang aga.
Pahayag sang punong ehekutibo, masobra sa P16-billion ang balor sang mga transaksyon nga nagsulod sa account sang Silverwolves halin sang 2022 tubtub 2025. Kalabanan sini suno sa iya ang naangot sa flood control projects sang Department of Public Works and Highways (DPWH).
Kabug-usan nga 280 bank accounts ang na-freeze suno kay Marcos amo man ang 22 insurance policies, tatlo ka securities accounts, kag walo ka air assets sang kumpaniya lakip na ang eroplano kag helicopter nga na-link sa Sky Yard Aviation.
“Para sa mga Pilipinong paulit-ulit binabaha, nawawalan ng bahay at kabuhayan, hindi na maaaring nakawin ang pondong para sa inyo at basta na lamang tumakas sa hustisya,” pahayag pa sang presidente.
Matandaan nga una na gintawag ni Ombudsman Jesus Crispin “Boying” Remulla si Eric Yap nga “person of interest” kaangot sa nabayaran na apang wala pa natapos nga flood control projects sa La Union paagi sa firm nga ginapanag-iyahan sini sadto.
Ginsiling man ni Remulla nga nagbaton sanday Edvic Yap kag Bulacan Rep. Salvador Pleyto sang kuwarta paagi sa bank transfers halin sa bilyonaryo nga mga kontraktor nga sanday Curlee kag Sarah Discaya.
Si Eric Yap amo ang House appropriations panel chairperson sang administrasyon ni former President Rodrigo Duterte. Nemensyonar ang pangalan sini sa Senate hearing sang Septyembre, apang una na ini nagpanginwala nga may kahilabtanan siya sa eskandalo sa kurapsyon.
Una na nga nagpaandam si President Marcos nga padayon ang pagpasaka sang kaso kag madamo ang mahimo nga mapreso antes ang Paskuwa.#
