Nagkitaay sanday President Ferdinand Marcos Jr. kag anay President Rodrigo Duterte sa Malacañang, Agusto 2.
Ginpakigbahin ni Senator Bong Go ang mga laragway sa pagsapol sang duha kun sa diin yara man si First Lady Liza Araneta-Marcos kag iban pa nga mga opisyal.
Suno kay Presidential Communications Office Secrectary Cheloy Garafil, nagkadto si Duterte kay Marcos agud istoryahan ang iya pagbisita kay Chinese President Xi Jinping sa China sang nagligad nga bulan.
Suno pa kay Garafil, may gin-istoryahan nga iban pa nga mga isyu kag may mga panugyan man nga ginhatag ang anay presidente.
Hulyo 17 sang nagbisita si Duterte kay Xi sa Beijing matapos nga nag-komemorar ang Pilipinas sang ika-pito nga anibersaryo sang maragtason nga arbitral ruling sang 2016 kun sa diin ginpabakod pa ang exclusive economic zone sang Pilipinas sa West Philippine Sea sa pihak sang pag-claim sang China. #
