Ginpanginwala ni Lovejoy Hosenilla, head sang Anti-Squatting and Illegal Structure Unit, ang alegasyon nga nanumbag ini kag ginkuha ang bag sang isa ka bolantero sang nagligad nga natabo nga komosyon sa Iloilo Terminal Market.
Sa interview sang Bombo Radyo kay Hosenilla, iya ginpahayag nga sa 13 ka tuig sini nga pagpangalagad bilang punong barangay, wala ini sang rekord nga nagpanakit sang tawo.
Suno pa sa iya, naga-“paluoy-luoy” sa publiko kag naga-“himo-himo sang istorya” ang amo nga bolantero agud mangin malain ang iya imahe amo man ang upod sini nga nagpatigayon sang clearing operations.
Nagpahayag man ini nga handa siya nga magkadto sa pulis kag atubangon ang bisan ano nga kaso nga ipasaka batok sa iya agud mangin klaro ang matuod nga natabo.
Nahibaluan nga ginpahayag sang isa ka bolantero nga si Jerry Brendia nga si Hosenilla mismo ang nagkuha sa iya bag nga naga-unod sang kwatro mil pesos samtang nakasukbit ini sa iya lawas sang Byernes, Abril 10, 2026 kun sa diin nagluntad ang kinagamo sa tunga nila sang Local Economic Enterprise Office kag sa mga bolantero sa syudad sang Iloilo.
