Nagpaandam ang Embahada sang China nga magabalos ini sang pareho nga pagtratar kun ideklarar nga persona non grata sa Pilipinas ang ila mga diplomat.
Sa Facebook post kahapon, ginpahayag sang embahada nga kun indi sila welcome sa Pilipinas, indi man sila mag-welcome sa sini nga mga tawo sa China.
“Since you don’t welcome us, we don’t welcome you, either. Fair enough,” suno sa post.
Ini ang sabat sang embassy matapos nag-file si Senador Risa Hontiveros sang Senate Resolution Number 746 nga nagapangabay kay Presidente Ferdinand Marcos Jr. nga ideklarar si Chinese Ambassador Jing Quan nga persona non grata ukon magpangabay sa gobyerno sang China nga ipabalik siya sa ila pungsod.
Nagdugang ang mga panawagan nga ideklarar nga persona non grata ang ambassador kasunod sang iya mga pahayag nga mahapos nga malupig sang China ang Pilipinas kon maggamit ini sang puwersa.
Una na nga ginpahayag sang Malacañang nga wala sang tuyo ang Presidente nga ideklarar nga persona non grata ang bisan sin-o nga foreign diplomat bangud mas ginapaboran niya ang pagsulbar sang mga away sa tunga sang mga pungsod paagi sa diplomatiko nga paagi.
Sa iya resolusyon, ginkilala ni Hontiveros ang posisyon sang Presidente, apang ginpunto niya nga may kinamatarong ang Pilipinas nga magpatuman sang dugang nga diplomatiko nga lihok kun kinahanglanon.
Ginpahayag man niya nga luyag ipabutyag sang Senado ang indi sini pagsugot sa ginalaragway nga indi diplomatiko nga pamatasan sang isa ka foreign envoy, samtang ginakilala ang awtoridad sang Presidente, suno sa Konstitusyon, sa pagdumala sang foreign affairs sang pungsod.
