Natalana nga magbisita si President Ferdinand Marcos Jr. sa Germany sa bulan sang Marso antes ang 70th anniversary sang diplomatic relations sang duha ka pungsod nga natalana pa sa Oktubre.
Gin-anunsyo ini sang presidente kadungan sang iya meeting kay German Federal Foreign Minister Annalena Baerbock sa Malacañang subong nga Huwebes, Enero 11.
Ginpakigbahin man ni Marcos nga halin sang nagliligad pa nga bulan, nagapakig-angot na ang Malacañang sa Germany agud nga mahitso ang amo nga byahe apang subong lamang na-finalize nga sa Marso 12 na ang schedule sang trip.
Ang katapusan nga presidente sang Pilipinas nga nakabisita sa Germany amo si late President Benigno “Noynoy” Aquino III nga may official trip sang 2014.
Nahibaluan nga halin sang nagpungko si Marcos bilang presidente umpisa sang Hunyo 30, 2022, nakapatigayon na ini sang 19 ka mga byahe sa luwas sang pungsod.
Ini nga mga byahe ang masami nga ginamuno sang mga kritiko apang maabtik man sa pagdepensa ang administrasyon nga ang amo nga foreign travels ang makaganyat sang dugang nga investments para sa pungsod. #
