Nagmandu si President Ferdinand Marcos “Bongbong” Marcos Jr. sa Department of Public Works and Highways (DPWH) nga buhinan sang tubtub tunga ang balor sang construction materials para sa mga proyekto sang gobyerno.
Ginkumpirma ni Marcos ang iya mandu kay Secretary Vince Dizon antes siya nagbiya para magkadto sa Malaysia para sa 47th Association of Southeast Asian Nations (ASEAN) Summit and Related Summits.
Suno kay Marcos, tuyo sang amo nga tikang nga makakinot ang gobyerno sang tubtub sa P30-billion tubtub sa P45 billion.
“In order to ensure that the costs of DPWH will reflect the costs of the market and to ensure that the people’s money is correctly spent, I have directed the DPWH Secretary to bring down the cost of materials by as much as 50% which will result in savings in the Capital Outlay spending of at least 35 to 45 billion pesos,” pahayag sang chief executive.
Ang makinot nga kuwarta ang pagagamiton suno sa iya para sa serbisyo sa ikaayong-lawas, edukasyon, kag pagkaon nga kinahanglan sang mga pumuluyo.
Ini nga development ang kasunod sang natukiban sang DPWH nga may mga item kaangay sang aspalto, steel bar, kag semento nga overpriced sang tubtub sa 50 porsyento.
Matandaan nga sang nagligad nga Lunes, nagpahayag si Dizon nga nagaplano ang ahensya nga buhinan ang balor sang mga materyales para sa mga proyekto kada rehiyon bangud may mga natukiban nga overpriced.
Nahibaluan nga sentro subong ang DPWH sa nagakatabo nga corruption scandal kun sa diin lakip sa mga involved amo ang anay mga opisyal sang ahensya, mga mamalidha, kag mga kontraktor nga nagbulsa sang binilyon ka pesos paagi sa pag-implementar sang “ghost”, non-existent, kag substandard nga mga proyekto.
