Malipayon nga gin-report ni President Ferdinand Marcos Jr. nga wala na sang aktibo nga guerilla fronts ang New Peoples’ Army (NPA) diri sa Pilipinas as of December 2023.
Sa isa ka video message, ginpahayag sang presidente nga napapas sang pwersa sang gobyerno ang 1,399 ka mga miyembro sang extremist groups kag nakumpiska ang 1,751 ka mga armas luthang.
Ginpahayag man sini nga ang kadalag-an batok sa “internal terrorism” ang mahimo maangot sa maayo nga performance sang Armed Forces of the Philippines (AFP) kag Philippine National Police (PNP).
“These accomplishments underscore our steadfast commitment to peace and stability,” pahayag pa sang presidente.
Sang nagligad nga tuig, matandaan nga nag-grant sang amnestiya ang presidente sa current kag anay mga myembro sang mga rebelde nga grupo nga nakahimo sang krimen bangud sa ila nga “political beliefs.”
Gin-amyendaran man sini ang Executive Order No. 125 ukon ang Creation of the National Amnesty Commission agud masabat ang pag-proseso sang aplikasyon para sa amnestiya sa idalom sang bag-o nga mga proklamasyon.#
