Nagpanugyan ang Malacañang sa publiko nga posible mangin malawig ang State of the Nation Address (SONA) ni Presidente Rodrigo Duterte sa Hulyo 22.
Suno kay Presidential Spokesman Atty. Salvador Panelo, luyag ni Presidente Duterte nga mag-lecture ilabi na sa mga kritiko sang administrasyon.
Ini man bangud sa padayon nga pagpakamalaot sang mga kritiko sa Presidente bangud sa pagpahanugot sini nga makapangisda ang China sa Exclusive Economic Zone sang Pilipinas.
Dugang pa sang natungdan, indi makahangop ang mga kritiko sa luyag nga ipaathag ni Duterte may kaangtanan sa independent foreign policy sang administrasyon partikular sa pagpakigbagay sa China.
Gintawag ni Panelo ang mga kritiko sang Presidente bilang mga sutil lakip na diri amo sanday Department of Foreign Affairs (DFA) Sec. Albert del Rosario, anay Ombudsman Conchita Carpio Morales kag Supreme Court Senior Associate Justice Antonio Carpio nga luyag ipaon ang Presidente sa China.
Pahayag pa ni Panelo, ginapaagi na lamang ni Duterte sa pagsunlog sa mga kritiko sa diin ginmanduan niya ang mga ini nga magsakay sa barko sang Estados Unidos kag sila ang una nga magpamomba sa China.
Nahibaluan nga sang 2018 SONA ni Presidente Duterte,nagdugay lamang ini sang 48 tubtob 50 ka minutos, ang 2017 SONA ang nagdugay sang duha ka oras samtang ang pinaka-una nga SONA niya sang 2016 ang nagdugay sang isa kag tunga sa oras.
