Nakaandan gid nga istrikto ang mga paagi sa pagkumpirma sang aton nga identity — halimbawa, kun may gawadon kita nga mga dokumento ukon may kuhaon nga kuwarta.
Para man ini sa aton nga seguridad kag proseso ini agud makalikaw sa mga criminal.
Apang sa natabo sa Shandong Province sa China, agaw-atensyon gid ang paagi agud personal nga makumpirma sang isa ka tawo ang iya identity sa bangko.
Ginpaathag sang pamilya sa bank manager nga na-ospital ang account holder bangud sa malala nga balatian.
Apang wala gid nagpadala ang manager kag gin-insister gid sa pamilya nga ang nagaisahanon nga paagi agud ma-access ang account sang holder amo nga dal-on ini sang personal sa bangko.
Nagsiling pa ang bangko nga pwede man makarga sa ambulansya ang account holder, apang nagpahayag naman ang ospital nga pwede lang mapaguwa ang ila ambulansya sa mga health-related emergencies.
Indi man makasarang ang pamilya sang private ambulance gani ang nabilin nga solusyon amo nga dal-on kag itulod ang hospital bed nga ginahigdaan sang pasyente pakadto sa bangko.
Madasig nga naglapta ang videos kag pictures sang nag-abot ang hospital bed sa bangko kag ginatinguhaan sang bata nga makapalapit sa counter sang clerk nga wala sang may bisan isa nga mabungguan.
Kinahanglan gid abi sang pamilya ang kuwarta para sa treatment, apang nagalain gid ang ila buot nga mabutang man gihapon sa katalagman ang kabuhi sang pasyente agud lamang nga ma-access nila ang kuwarta nila sa bangko.
Madamo naman ang nagsita sa bangko kag nag-apelar nga kuntani may yara man sang exception sandig sa ebidensya nga ginpresentar sang pamilya nga na-ospital ang ila himata kag nabudlayan sa paghulag.#
