Nagdangat na sa P135.3-million ang damage kag kapierdehan sa sektor sang agrikultura bangud sang epekto sang Southwest Monsoon ukon Habagat kag sang bag-o lang nga mga bagyo nga Luis kag Maymay.
Suno sa Department of Agriculture (DA), na-record ang mga danyos sa Ilocos Region, Central Luzon, Calabarzon, Mimaropa, kag Western Visayas.
Ini ang nakaapekto sa kapin 4,516 ka ektarya sang agricultural areas.
Lakip sa mga naapektuhan ang humay, mais, high-value crops, livestock, kag mga imprastraktura, makina kag equipment sa pagpanguma.
Pinakadaku ang na-record nga losses sa humay nga naglab-ot sa P102.01-million, samtang ang mais nakarecord sang P4.05-million nga damage. Nadamage man ang livestock kag poultry nga naglab-ot sa P43,600.
Samtang, ang mga irrigation facilities nakarecord sang P16.1-million nga damage, kag ang mga farm structures naman naglab-ot sa P1.2-million.
Bangud man sa Habagat kag mga bagyo, nag-abot sa 4,465 metric tons ang napierde nga agricultural production. Suno sa DA, naapektuhan man ang kapin 6,010 ka mangunguma.
Ginpahayag sang DA nga ang mga apektado nga mangunguma makabaton sang P106.5-million nga farm inputs, lakip ang mga binhi sang palay, mais kag mga utan.
Mahimo man sila makautang sang tubtob P25,000 paagi sa Survival and Recovery ukon SURE Loan Program sang Agricultural Credit Policy Council.
