ILOILO – Naglab-ot sa 1,147 ka mga pulis ang gin-promote sa trabaho kadungan sang Simultaneous Oathtaking, Donning and Pinning of Ranks sang Philippine National Police sa Western Visayas.
Santo sa data sang Police Regional Office 6, naglab-ot sa 156 nga Patrolman ang ginpromote bilang Police Corporal, 440 ka Police Corporal ang ginpromote bilang Police Staff Sergeant, 100 ka Police Staff Sergeant ang ginpromote bilang Police Master Sergeant, 72 ka Police Master Sergeant ang ginpromote bilang Police Chief Master Sergeant, 231 ka Police Chief Master Sergeant ang ginpromote bilang Police Chief Executive Master Sergeant.
Sa interview sang Bombo Radyo kay Police Lt. Colonel Joem Malong, tagpamaba sang Police Regional Office 6, iya ginpahayag nga ang promotion ang makabig nga morale booster sa mga pulis.
Magluwas diri, ginpahayag ni Malong nga ang promotion ang makabig man nga padya para sa pamilya sang tanan nga pulis.
Suno kay Malong, ang pagtaas sang rangko ang nagakahulugan sang mas madamu nga katungdanan.
Ginpahayag ni Malong nga nagalaum si Police Brigadier General Rene Pamuspusan, director sang Police Regional Office 6, nga mangin maayo ang performance sang 1,147 ka mga pulis nga ginpromote sa trabaho.
