ESTANCIA, ILOILO – Nagsabat si Estancia Mayor Rene Cordero may kaangtanan sa akusasyon nga may yara siya sang goons kag nagapang-harass.
Sa interview sang Bombo Radyo kay Cordero sang nasambit nga banwa, iya ginpahayag nga wala sang kamatuoran ang nasambit nga akusasyon kag ginapasibangdan lang siya sang mga kasumpong sa pulitiko.
Sa pagkamatuod suno kay Cordero, ang kampo ni mayoralty candidate Melina Requinto ang may yara sang madamo nga goons.
Pahayag pa ni Cordero, sa caucus ni Requinto, ginpahayag sang iya kasumpong nga sang una, napatyan sila sang miyembro kag sa subong sila naman ang magapamatay.
Nahibaluan nga nagpa-blotter sa Estancia Municipal Police Station ang kampo ni Requinto bangud sa ginapahayag duha ka makaduluda nga tawo nga nagaluyong sa balay sang nasmabit nga mayoralty candidate.
