Nag-isyu si Mayor Raisa Treñas sang Executive Order No. 006 Series of 2026 nga naga-provide sang safety kag security measures sa tunga sang Dinagyang Festival Celebration.
Sa interview sang Bombo Radyo kay Joy Fantilaga Gorzal, spokesperson ni Mayor Raisa, iya ginpahayag nga ang E.O. nagatuyo nga mahatag ang nagakaigo nga kaluwasan kag seguridad sang tanan nga responders, VIPs, turista, bisita, kag mga pumuluyo.
Suno kay Gorzal, ini nga mando nagatukod sang mga security protocols nga ginapatuman sang Iloilo City Police Office upod sa AFP, kapulisan, kag iban pa nga ahensya sang gobyerno.
Lakip sa mga ginadumilian amo ang pagpalupad sang drones nga wala sang permit, pagsindi sang firecrackers nga wala sang permiso, pagdala sang armas, pag-inom kag abusive behavior nga nagaresulta sang peligro sa publiko, kag paghiwat sang political rallies ukon anti-government protests sa sulod sang selebrasyon.
Ginalimitahan man ang pagbaligya kag pag-inom sang makahulubog nga ilimnon halin alas 8:00 sang aga tubtob alas 2:00 sang kaagahon sa mga adlaw sang Enero 22–26, 2026.
Ang tanan nga ahensya sang syudad, kapulisan, barangay officials, kag volunteer force multipliers ginmanduan nga magbuligay sa pagpatuman sang ini nga mga regulasyon agud mangin malinong kag masadya ang Dinagyang Festival.
