Nagpamalibad nga maghatag sang reaksyon si Mayor Raisa Treñas parte sa Assistance to Individuals in Crisis Situation (AICS) scandal.
Ini matapos ginpasakaan na sang Department of Social Welfare and Development (DSWD) sa Office of the Ombudsman sang kaso-administratibo nga grave misconduct, graft, kag abuse of authority ang 14 ka indibidwal, kun sa diin 2 sini ang empleyado sang City Hall ang involved kag 12 ang Barangay Officials sa syudad.
Kadungan sang pagfile sang kaso kahapon nga adlaw, nagpatigayon man sang local development council meeting si trenas kaupod ang city council.
Suno kay Mayor Treñas indi lang ini anay maghatag sang reaksyon kag hulaton lang anay ang kabilugan nga papeles antis ini maghatag sang komento natuhoy sa mga indibidwal nga ginpasakaan sang kaso sang DSWD kag Office of the Ombudsman bangud sa AICS scandal.
Samtang, gintinguhaan man sang Bombo Radyo nga mangayo sang pahayag halin kay Punong Barangay Visamin Cañal sang Quezon, Arevalo, apang “NO COMMENT” lamang ang sabat sang Punong barangay.
Suno kay Cañal, indi pa ini makabuya sang pahayag kay wala pa ini nakahibalo kon ano gid ang eksakto nga kaso nga ginpasaka batok sa iya.
Samtang, nakig-angot man ang Bombo Radyo kay Punong Barangay Remedios Bedia sang Lanit, Jaro Iloilo City apang naglikaw kag nagpalagyo ini sang ginpamangkot kun ano ang iya reaksyon sa pagdala sang iya pangalan sa pagasakaan sang kaso sa AICS scandal.
Dugang pa diri, nadala man ang Iloilo City Hall employee nga si Johnny Paul Dizon kun sa diin na-assigned sa Atipan Center, isa sa duha ka empleyado sang City hall nga ginpasakaan sang kaso sang DSWD kag Ombudsman.
Nahibaluan nga ang Atipan Center ang isa sa mga programa sang administrasyon ni Mayor Treñas nga nagahatag sang libre nga serbisyo sa pumuluyo.
Padayon naman nga nahulat ang masunod nga mga pahayag halin sa mga concerned officials.
