ILOILO CITY – Na-rescue sang Task Force on Moral and Values Formation ang isa ka 17-anyos nga babayi samtang kaupod ang iya ginapahayag karelasyon sa sulod sang isa ka lodging house sa Brgy. Sto. Niño Norte, Arevalo, Iloilo City subong nga Valentine’s Day, Pebrero 14.
Sa interview sang Bombo Radyo kay Nestor Canong, pinuno sang Task Force on Moral and Values Formation, iya ginpahayag nga ‘rescue’ ang ila ginagamit nga termino sa amo nga operasyon bangud menor ang babayi.
Pahayag pa ni Canong, base sa Republic Act 9344 ukon Justice and Welfare Act of 2006, ang isa ka menor ang mahimo pa nga mahaylo, mapilitan, ukon madasig man nga mag-ilis sang pinsar kaangot sa iya mga desisyon.
Indi mahimo suno sa iya nga tawgon ang operasyon nga ‘pagdakop’ ukon ‘pagkuha’.
Nahibaluan nga isa ka Senior High School student ang babayi, samtang nagapang-edaron naman sang 19 anyos ang lalaki nga upod sini.
Suno kay Canong, may yara sila sang incognito team nga yara lang sa palibot kag naga-monitor kun bala gintuman sang mga establishemento sa syudad ang ila promisa sa Iloilo City Government nga hugton nila ang ila nga pagsulundan ilabi na sa paghibalo kun legal na ang edad ukon menor ang naga check in subong nga Valentine’s Day.
Ang operasyon ang ginhimo kaupod ang Women and Children’s Protection Desk (WCPD).
