Nakatalana nga inspeksyonon sang Iloilo City Bureau of Fire Protection, Iloilo City Engineering Office, MORE Power Electric Corporation, kag Iloilo City Government ang mga panimalay kag establisyemento sa syudad nga ginpaidalum sa fire zone barangay.
Sa interview sang Bombo Radyo kay Iloilo City Councilor Sedfrey Cabaluna, Chairman sang Committee on Public Safety and Fire, iya ginpahayag nga tuyo sang tikang nga sekyaron ang mga establisyemento kag puluy-an nga ara sa high risk sang fire zone barangay agud nga malikaw ini sa sunog ilabi nga tuman ka init ang tyempo.
Suno kay Cabaluna, may kapin 84 ka mga fire zone barangay ang Iloilo City sa diin kadtuan sang ahensya kag hatagan sang mga rekomendasyon agud nga matapna sa sunog.
Ginpahayag man sang natungdan nga hugot nga i-check ang mga eletrisidad sang establisyemento kun naka-comply sang mga gin-rekomenda sang City Goverment.
Matandaan nga sang tinalikdan nga tuig 2023, ginpaidalum ang mga barangay sa fire zone bangud sa tuman ka susceptible sa “electrical failure”.
