ILOILO – Ginmanduan na ang mga banwa sa probinsya sang Iloilo nga magpangita sang site sa ila tagsa ka lugar kun sa diin mahimo malubong ang mga mapatay nga COVID-19 patients.
Ini ang nangin resulta sa meeting nanday Iloilo Governor Arthur Defensor Jr. kag sang concerned nga mga ahensya sang gobyerno kahapon, Agusto 3.
Kasunod ini sang pagsuspinde sang Gegato Abecia Funeral Parlor and Crematorium sang ila pagbaton sang mga bangkay para sa cremation bangud tuman na kadamo ang ila mabaton nga cadaver kada adlaw.
Sa interview sang Bombo Radyo kay Iloilo Provincial Administrator Atty. Suzette Mamon, iya ginpahayag nga i-assess pa sang Department of Health (DOH) ang burial site nga matumod sang mga banwa.
Ini agud masigurado nga malayo ang lulubngan sa balay sang mga tawo.
Dapat man siguraduhon nga malubong ang bangkay within 12 hours matapos nga bawian sang kabuhi ang pasyente.
Tanan nga protocol nga sundon ang dapat aligned sa Department Order 2020-0063 sang Department of the Interior and Local Government (DILG).
