Ginkumpirma sang Armed Forces of the Philippines (AFP) nga may presensya pa sang mga barko sang China sa Ayungin Shoal sa West Philippine Sea.
Suno kay AFP Western Command commander Vice Admiral Alberto Carlos, lima ka Chinese maritime militia vessels (CMMV) ang yara sa sulod sang Ayungin samtang apat naman ang nagatinir sa guwa sang shoal.
Pahayag sini, subong nga tuig sang nagsugod ang maritime militia vessels sang China sa pagsulod sa amo nga teritoryo kun sa diin nahamtang ang BRP Sierra Madre.
Dugang sang opisyal, nagapadala man sila sang rubber boats agud matabog ang amo nga mga barko sa kada makit-an nga nagatinir ang mga ini sa shoal.
“Every time makita namin sila sa loob ng shoal, we deploy our rubber boats to non-confrontationally drive them away. Pinapaalis namin. The term always is non-confrontationally driving them away because it’s a calibrated response and we do not want to escalate the situation there anymore,” pahayag sini.
Matandaan nga lakip sanday Carlos kag AFP chief General Romeo Brawner, Jr. sa mga nag-upod sa misyon sa Ayungin Shoal sang Domingo sakay sa supply boat nga Unaizah Mae 1.
Sila mismo ang nakasaksi kun paano nagsunod ang Chinese coast guard kag maritime militia vessels tubtub nga nagbalabag na ini kag nagbomba sang water cannons sa resupply team sang pungsod.#
