Naglab-ot na sa 20 ka mga indibidwal ang napatay bangud sa paglaslas ni Severe Tropical Storm Kristine sa Pilipinas.
Ginpangsirado naman ang pila ka mga eskwelahan kag mga opisina sang gobyerno sa bug-os nga naaminhan nga bahin sang Pilipinas samtang ang bagyo nag-landfall sa Luzon Island.
Suno kay Regional Plice chief Brigadier General Andre Dizon, kalabanan sa mga napatay amo ang bangud sa pagkalumos ukon nalubong sa landslides.
Ginpahayag man ni Dizon, pito sa mga napatay ang nareport sa Naga, lima sa Catanduanes, apat sa Albay, kag tig-isa sa Camarines Norte, Camarines Sur, Sorsogon, kag Masbate — nga lunsay yara sa Bicol Region.
Sa Naga City kag sa banwa sang Nabua, nagagamit na sang mga sakayan ang mga rescuers agud malab-ot ang mga pumuluyo nga na-stranded pa sa mga atop.
Nagdeploy naman ang Philippine National Police (PNP) sang 908 ka mga kapulisan sa Bicol agud maghatag sang bulig sa mga biktima sang malain nga panahon.
Suno sa National Disaster Risk Reduction and Management Council (NDRRMC), as of today, may kabug-usan nga 2,077,643 ka tawo (431,738 ka pamilya) sa bug-os nga pungsod ang apektado sa Bagyo Kristine.
Suno naman kay Lorie Dela Cruz sang Philippine Atmospheric, Geophysical and Astronomical Services Administration (PAGASA), ginpahayag sang Armed Forces of the Philippines nga isa ka bulan nga balor sang ulan ang nagbubo sa rehiyon sa sulod sang 24-oras halin alas 8 sang aga sang Oktubre 22 tubtob Oktubre 23, sa diin ang probinsya sang Camarines Sur kag ang syudad sang Legazpi sa probinsya sang Albay partikular nga naigo.
