Padayon nga nagasinggitan sang hustisya ang pamilya sang babayi nga ginpatay, ginsulod sa sako, kag ginhal-id sa Barangay Pasil, New Lucena, Iloilo.
Matandaan nga Marso 2 sang nasapwan ang biktima nga si Jonalyn Saculdito, residente sang Barangay Nabitasan, Pototan, Iloilo.
Sa interview sang Bombo Radyo kay alias Nene, bata ni Jonalyn, iya ginpahayag nga wala sang bisan isa ka bebes nga ginpabay-an sila sang ila nga iloy.
Suno kay alias Nene, wala na sila naka-istoryahanay sang iya Iloy tubtob sang adlaw nga nasapwan ini sa New Lucena.
Indi man mabaton sang natungdan nga ila ginkabig nga ‘sapat’ ang iya Iloy bangud sa ila gin-ubra nga pagpatay diri.
Apisar sini, nagapabilin ang ila pagpati nga mahatagan sang hustiya ang brutal nga kamatayon sang ila nga iloy.
Samtang sa interview naman sang Bombo Radyo kay Kagawad Arlene Paras, Barangay Kagawad sang Nabitasan, Pototan, Iloilo, iya ginpahayag nga simple lang nga klase sang tawo ang iya pagkilala kay Sucaldito.
Suno kay Paras, wala man ini sang rekord sa barangay angut sa iligal nga droga.
Dugang pa niya, naka-istorya pa sini si Sucaldito sang aga bag-o ini nasapwan sa New Lucena sang Marso 2.
Nagakadlaw-kadlaw pa ini suno sa natungdan nga naga-istorya nahanungod sa iya nga live in partner.
Nahibaluan nga separado nga naga-istar sa lain nga balay si Sucaldito kaupod ang iya duha ka mga kabataan kag ang iya nga live in partner.
