Ginpa-Bombo sang pila ka mga manugpangisda sang Nueva Valencia, Guimaras ang grupo man ka mga manugpangisda nga ginapahayag nagapatigayon sang trawling method sa pagpangisda.
Ang trawling amo ang paggamit sang pukot nga nagatabid sa motorbanca samtang ini ang ginaguyod agud nga makakuha sang isda.
Sa interview sang Bombo Radyo kay alyas Eric, ang tagreklamo, iya ginpahayag nga taga Jordan, Guimaras ang ila mga nakit-an nga nagapatigayon sang trawling.
Suno kay Eric, madugay na ini nga isyu sa diin madamo naman ang nagareklamo sang trawling nga nagakatabo ukon ginakabig nga iligal nga pagpangisda.
Apang daw kaangay nga nagapadungol lang ang mga manugpangisda nga wala nagauntat sa pagpatigayon sang trawling apisar ginasaway man nila ang mga ini.
Ginpahayag ni Eric nga dako man ini nga huol para sa ila bangud nagakaluguba ang ila nga mga pukot.
Panawagan ni Eric sa mga kaangay man niya nga manugpangisda, indi na magpawala kag untatan na ang trawling method bangud nagakadalahig ang ila ang palangabuhian kag nagakaguba man ang ilistaran sang mga isda.
