ILOILO CITY – Hugot nga ginapasalig sang Local Economic Enterprise Office nga nagasunod sila sa mandu ni Iloilo City Mayor Jerry Treñas nga wala dapat sang may ma-displace nga mga market vendors kaangot sa pagkaayo sa Iloilo Central Market kag Iloilo Terminal Market.
Sa interview sang Bombo Radyo kay Mr. Ariel Castañeda, pinuno sang Local Economic Enterprise Office, iya ginpahayag nga may yara pa sang mga konsultasyon nga pagahimuon ang Public Private Partnership Council.
Suno kay Castañeda, indi pa pormal ang pagsinapol sa mga manugbaligya nga ginhimo sang nagligad nga semana kag wala ini nagakahulugan sang una kag katapusan nga konsultasyon.
Ginpahayag ni Castañeda nga igabalay ang Terms of Reference sang Public Private Partnership nga may yara sang tiglawas ang tagsa ka vendor associations kag pamatian ang ila nga sintemiyento.
