Nagpaandam ang Malacañang nga kasuhan ang mga tawo nga nagapalapta sang fake news nga magapatuman sang lockdown ang gobyerno bangud sa problema sa suplay sang gatong kag bangud sa gina-alegar bag-o nga variant sang COVID-19.
Suno kay Presidential Communications Office (PCO) Secretary Dave Gomez, indi pag-itolerar sang Palasyo ang amo sini nga sahi sang malisyoso nga mga pahayag nga nagatuyo lang nga mapalapta ang ila personal kag pulitikal nga mga interes.
“In light of the current energy landscape, we warn anyone who deliberately fabricates stories and spreads fake news online to exploit the situation that they will be held to account to the fullest extent of the law,” suno kay Gomez.
“There will be zero tolerance for those who maliciously and deliberately commit these acts to advance their personal or political vested interest,” dugang pa sang Malacañang official.
Matandaan nga may naglapta sa social media nga may “emergency lockdown” nga maga-umpisa sa 20.
May yara pa gid sang online post nga naga-unod man sang sala nga impormasyon nga may “emergency lockdown” nga himuon bangud sa COVID-19 Cicada variant.
Sa amo nga post, gin-gamit pa ang logo sang health department agud mapagwa nga lehitimo ang iya post.
Suno sa PCO, gina-verify na nila ang original sources sang amo nga posts.
Nagpahanumdom ini nga ang pagpaguwa sang sala-sala nga mga impormasyon ang mahimo masilutan sang tubtub sa anum ka bulan nga pagkapreso sa idalom sang Article 154 sang Revised Penal Code.
Mahimo pa mag-isa ka tuig ang pagkapreso kun mapamatud-an nga ang sala ang nakomiter online ukon sakop na sang Republic Act No. 10175 ukon ang Cybercrime Prevention Act.
Suno pa sa Malacañang, makabig nga serious offense ang anuman nga tuyo nga patalangon ang publiko kaangot sa energy security, supply ukon presyuhanay subong sa tunga sang krisis dala sang gyera.
Matandaan nga may anti-fake news nga gintukod ang PCO sang nagligad nga bulan nga may koordinasyon sa Department of Justice agud nga mapasakaan gilayon sang kaso ang nagapalapta sang deceptive information ukon naga-manipulate sang markets.
Gina-monitor sang PCO kag mga partner sini sa Oplan Kontra Fake News initiative ang social media kag iban pa nga information platforms agud ma-detect kag mabali gilayon kun may yara sang disinformation campaigns.#
