Nagpaandam ang Department of Energy (DOE) nga kasuhan gid sang ahensya ang tanan nga nagapamentaha kadungan sang pagtimbuok sang presyo sang produktong-petrolyo sa masunod nga semana.
Sa interview sang Bombo Radyo kay Energy Secretary Sharon Garin kadungan sang iya pagbisita sa Iloilo, ginpahayag sini nga ini nga mandu ang halin mismo kay President Ferdinand Marcos, Jr.
Suno kay Garin, apisar nga kulang sila sa personnel sa idalom sang ila ahensya, pagabuligan sila sang Department of the Interior and Local Government (DILG) paagi sa mga alkalde kag mga pulis agud nga matapna ang ginahimo sang violators.
Sakop sang pagpamentaha ukon nagahingalit sang sitwasyon amo ang naga-abuso sa pagpasaka sa presyo kag ang tanan nga involved sa profiteering kag hoarding.
“We have to reprimand, we have to file cases to those that are abusing, profiteering, and nag-ho-hoarding. That’s not a Filipino way. Tayo po sama-sama tayo, nagtutulungan tayo. Yung mga hindi sumusunod, yung nag-te-take advantage, hindi maka-Pilipino yan,” suno sa tiglikom.
Suno pa kay Garin, ipalantaw sini kag pag-imbestigaran sa field office ang reports nga may gasoline stations sa Iloilo nga lab-ot na sa P75 kada litro ang baligyaanay sa kada litro sang diesel subong pa lamang nga semana.
Kun may kaangay sini nga reports kag kun may ginaalegar nga iregularidad, dapat nga i-report gilayon suno kay Garin ukon padal-an sila sang resibo agud nga makadtuan kag mahimuan sang nagakaigo nga tikang.
Gin-post naman sang ahensya ang government hotline nga mahimo mapakig-angutan nga amo ang 8888, ang DOE Consumer Welfare and Promotion Office telephone number nga 8840-2267, kag ang Department of Energy Official Facebook Messenger, ukon via email sa cwpo@doe.gov.ph.
Sa idalom sang Republic Act (RA) No. 7581 ukon ang Price Act, ginakonsiderar ang hoarding kag profiteering bilang price manipulation kag mahimo masilutan paagi sa multa nga kuwarta kag pagka-preso.
“Presidential Decree No. 1865, signed on May 23, 1983, which amends Batas Pambansa Blg. 33 also strengthens penalties for illegal acts involving petroleum products in the Philippines,” sandig sa nauna nga press release sang ahensya.
Ang ginaantisipar nga big-time price hike sa fuel products sa Pilipinas sa masunod nga semana ang kabahin na sang epekto sa nagasingki nga tension sa Middle East nga nag-umpisa sang nag-atake ang US kag Israel sa Iran nga ginbalusan naman sang missile strikes sang Tehran.#
