Lapaw na sa numero sang missing nga gindeklarar sang Philippine Coast Guard ang numero sang mga nakit-an nga bangkay kasunod sang paglugdang sang M/V Trisha Kerstin 3 sa Basilan.
Buot silingon, may mga pasahero nga wala nakalista sa manifesto sang barko antes natabo ang trahedya sang Enero 26.
Suno kay Celso Lobregat, Executive Secretary sang City Mayor’s office sang Zambonga City, gin-ako sang iban nga mga survivors nga nagbakal sila sang ticket sa sulod na mismo sang barko ukon sa scalpers, gani wala sila nadala sa opisyal nga listahan sang mga sakay.
Matandaan nga sa una nga pahayag sang Philippine Coast Guard, 18 ka bangkay ang na-recover kag 10 pa ang missing nga padayon nga ginapangita.
Apang sa subong, naglab-ot na sa 33 ang kabug-usan nga numero sang mga napatay nga narekober.
Gin-ako sang Philippine Coast Guard nga ang una nga datos ang nabase lamang sa manifesto, gani padayon pa ang imbestigasyon nahanungod sa matuod nga kadamuon sang sakay kag sa ginhalinan sang paglugdang sang amo nga Roll On-Roll Off vessel.
Ginsaysay man sang mga nakaluwas nga tuman nga kabudlayan nga ila gin-agyan sa dagat samtang nagahulat sang bulig sa tunga sang madulom kag matugnaw nga sitwasyon.
Sa karon padayon naman nga ginapangita pa ang iban nga nadula.
